Nagmalampuson ang usa ka joint buy-bust operation nga gihimo sa taga CIU/CDEU, RID 7, NISG CENTRAL ug Philippine Navy batok sa usa ka High-Value Individual.
Pasado alas 2:00 kagahapon sa hapon, Nobyembre 24, 2023, gipahigayon ang anti-illegal drug operation didto sa Sitio Cawot, Barangay Bangkal, dakbayan sa Lapu-Lapu.
Ang suspetsado giila sa kapulisan nga mao si Andre Embalzado, 47 anyos ang panuigon, ulitawo, residenti sa Purok Tambis , Barangay Yati, lungsod sa Liloan, Sugbo.
Nakuha sa iyang position ang mga binultong shabu nga adunay timbang nga 1500 grams, street value nga mubalor og PhP10, 200, 000.00, lakip nga nakuha ang 357 Caliber Revolver na adunay lima ka mga bala.
Nikabat sa pipila ka semana ang gihimo nga pagpaniid sa suspetsado sa illegal niining kalihukan sa ginadiling drugas.
Sa nasayran nga tunga ngadto sa usa ka kilo sa ginadiling drugas ang mahalin ni Embalzado matag semana.
Sa pagkakaron padayon nga gisusi sa kapulisan kung si kinsa ang tinugdan sa ginadiling drugas sa dinakpan ug gi andam na usab ang tukmang kaso niini. (Renante Lada, photo courtesy of PRO-7)
